Spraikada.

Euskal graffitigintzaz ARGIA.COMen

Spraikada — 2009-10-13

ARGIA.COM webgunean bideo-erreportajea argitaratu dute aste honetan Euskal Graffitigintzaren inguruan. Hainbat graffitigile euskaldun ez ezik, Sonia Perez Anguera Topagunearen Haur eta Gazte Saileko arduraduna ere elkarrizketatu dute erreportajea egiteko. Topaguneak antolatzen duen Spraikadaren inguruko azalpenak ematen ditu Soniak jarraian ikus dezakezuen bideoan.

Eskuak airean!

Spraikada — 2009-07-21

Garffitiaz gain, rapa, hip-hopa eta break dancea ere ez ziren falta Mutrikuko Spraikadan. Sari banaketa baino lehen, Aritz Sound Systemek eta Norte Apachek giro ederra sortu zuten plazan. Euren kanta bat aprobetxatu dugu eguneko 'bideoklipa' egiteko.

Spraikada ETBn

Spraikada — 2009-07-20

ETBko informatiboetan Spraikadari buruzko piezatxoa emititu zuten igandean. Galdu zenutenok, hemen duzue ikusteko aukera:

Gasteizera joan dira SPRAIKADA '09ko hiru sariak

Spraikada — 2009-07-18

Kostata, baina epaimahaiak erabakia hartu du jadanik. Hauek dira SPRAIKADA '09, Euskal Herriko VI. Graffiti Lehiaketaren irabazleak. Hiru sariak Gasteizera joan dira azkenean:

3. SARIA (900€): Urak dakarrena urak daroa (FRIKUNO - GASTEIZ)
2. SARIA (1.200€): Mutriku kolorez blai (OJODEKUERVO eta KAPONE - GASTEIZ)
1. SARIA (1.500€): Rage eta Kerosekin Mutriku salbu dago (RAGE eta KEROS - GASTEIZ)

Eguneko argazki gehiago, gure Flickr kontuan: http://www.flickr.com/photos/topagunea/collections/72157618690600951/

SPRAIKADA '09 - Buruz burukoaren mapa

Spraikada — 2009-07-17

Mutrikun dena prest dago SPRAIKADA '09-ren buruz burukoa egiteko. Bisitan etorri behar baduzue, hemen duzuen graffitiak non egingo diren jakiteko mapa bat (egin klik ikurraren gainean gune bakoitzeko graffitia/k ikusteko).

Ikusi SPRAIKADA '09 - Finala mapa handiago batean

Spraikada aldizkaria jadanik kalean! eskura ezazu

Spraikada — 2009-07-16

Euskal Herriko graffiti lehiaketak azken bost urteotan egindako ibilbidean, egitasmoaren izaera propioa garatzen joan da. Hala, lehiaketa soil gisa hasi zena erreferentzia bihurtu da bere alorrean, eta lehiaketatik harago, graffitia sustatzeko ekimen integrala izatara pasa da, jarduera dibertsifikatuz.

2008an lehiaketak bost urte betetzen zituela ospatzeko www.spraikada.com ataria estrenatu genuen. Webguneak Euskal Herriko graffitigileen topagunea izan nahi du.

Aurten ere beste berrikuntza batekin dator graffiti lehiaketa: SPRAIKADA ALDIZKARIA graffitiak EHan eta lehiaketaren bitartez egin duen bidea iruditan biltzen duen argitalpena. Aldizkaria graffitigileek egina da eta Spraikada lehiaketaren ibilbideaz gain, kaleko artearekin lotutako beste zenbait kontu biltzen ditu: graffitiaren historia, graffitian oinarritutako diseinuaren oinarriak, han-hemenka egindako graffiti ikusgarrien irudiak, graffitigintza alorreko hiztegia...

Hori guztia eta gehiago 68 orriko argitalpen batean, oso osorik koloretan eta dohainik eskuratu ahal izango duzuna Mutrikuko buruz burukoan bertan edo eta Topagunean eskaera eginez . Lortu zure alea!

Mutrikuko kaleak kolorez beteko dira larunbatean

Spraikada — 2009-07-14

Uztailaren 18an, larunbata, Spraikada Euskal Herriko VI.Graffiti Lehiaketa ospatuko da Mutrikun. Lehiaketan parte hartuko duten hamar taldeak aukeratuak izan dira jadanik eta zirriborroak ikusi daitezke jadanik (zirriborroak flickr-en).

Maila handiko norgehiagoka ikusteaz gain, egitarau zabal eta parte hartzailea eskura izango da egun osoan. Graffiti eta break dantza tailerrak, Dj zein break dantzarien ikuskizunak eta Bertsound System (Aritz Sound System, Xabier Silveira, 121 Krew, Norte Apatxe) izango dira besteak beste.

Larunbateko lehiaketa heldu bitartean, motorrak berotzen dabilen egitarau osagarria martxan da.

Badator Spraikada! egun pasa aukera paregabea!

Open publication - Free publishing - More topagunea

Spraikada09 lehiaketarako lanak aurkez daitezke oraindik

Spraikada — 2009-06-16

Graffiti idazleak garaiz dabiltza oraindik aurtengo Spraikadan parte hartu ahal izateko. Spraya-ak eta 7x2 metrotako hormak prest daude jadanik eta parte hartzaileek beren lan proposamenak aurkeztu behar dituzte ekainaren 30a baino lehen. Spraikada.com

Bitartean, uztailaren 18an Mutrikun ospatuko den SPRAIKADA lehiaketaren berria hainbat gune espezializatutara zabaltzen ari da. CREAM 01 denda-sareak eta APFIDI.com atariak lehiaketaren berri eman dute egunotan eta hainbat sare sozialetan ere badabil berria. Spraikada Tuenti lagun sarea bolo-bolo dabil, bisita kopuru etengabea jasotzeaz gain, lagun kopurua egunez egun handitzen doalarik. Izan ere, graffiti idazleen erakustoki eta topagune bihurtu da.

Uztailaren 18an Mutrikura nola heldu galdezka hasi da jendea jadanik. Udaleko webgunean aurki daiteke informazio zehatza.

Spraikada´09 izen-ematea zabalik

Spraikada — 2009-05-26

Topaguneak eta Mutrikuko Udalak SPRAIKADA '09 aurkeztu dute gaur, Euskal Herriko Graffiti Lehiaketaren VI. Edizioa. Lehiaketa seigarren ediziora iritsi izana “duen harrera eta indarraren seinale” dela esan du Topagunearen Gazte Saileko arduradunak, Sonia Perez Anguerak. Bere esanetan, Spraikada hitzordu klasiko bilakatu da dagoeneko euskal graffitigile eta zaletuen artean. Era berean, euskal graffitigintzaren harrobiaren erakusleiho paregabea ere bada Spraikada.

Kaleko hormak, museo

Mendaro, Getxo, Tolosa, Gernika-Lumo eta Erandiotik pasatu ondoren, Mutrikun izango da aurten buruz burukoa, uztailaren 18an. Mutrikuko Udalak 800. urteurrena ospatzen du aurten, Kutxaren laguntzaz, eta Spraikadaren buruz burukoa ospakizunen artean sartu nahi izan du. Era horretan, publiko gaztea ere urteurrenaren ospakizunetan inplikatzea bilatzen du Udalak, eta Mutrikuko kaleetako hormak gaur egungo adierazpide artistiko honen museo bilakatzea. Halaxe azaldu du Mutrikuko Udaleko Euskara eta Kultura zinegotziak, Iratze Garagarzak.

Buruz burukoan, betiko moduan, hamar graffiti lehiatuko dira, horretarako espresuki gordetako 7 x 2 metroko beste horrenbeste hormatan, 1.500, 1.200 eta 900 euroko sariak eskuratzeko. Aukera paregabea izango da Mutrikun egun pasa egin, graffitiak egiteko prozesua zerotik jarraitu eta graffiteatzen ikasten hasteko ere, tailerrak eta bestelako jarduera osagarriak ere ez baitira faltako.

Lehiaketan parte hartzeko, egin nahi den graffitiaren zirriborroa bidali behar da lehenengo eta behin, eta hori egiteko epea ekainaren 30era arte dago zabalik. Jasotako lan guztien artean, hamar onenak aukeratuko dira, eta horiexek izango dira Mutrikuko hormetan islatuko direnak.

Izen emateko baldintzei dagokienez, gutxitxo dira, eta betetzen errazak: 16 urtetik gorako gaztea izatea, graffitiko testuak euskaraz egitea, zirriborroa epea amaitu aurretik bidaltzea eta, finalista suertatuz gero, aukeratutako zirriborroko graffitia antolakuntzak emandako sprayekin egitea. Hortik aurrera, estiloa, teknika eta gaiak libreak dira erabat.

Informazio gehiago nahi dutenek, dena den, webgune honetan aurki ditzakete lehiaketaren oinarriak.

Open publication - Free publishing - More topagunea

Deia egunkariak erreportaia egiteko graffitilarien bila

Spraikada — 2008-09-03

Deia Egunkariak, graffitiaren gaineko erreportaia egin nahi du eta hori dela eta graffiti idazleen bila dabil. Zuetariko norbaitek erreportaiaren protagonista izateko interesa badu eta zuen lanak Deian argitaratuak ikusi nahi badituzue, deitu ondoko telefonora 610417899 irailaren 9tik aurrera.

Spraikada ALDIZKARIAN zuen lanak argitaratzeko aukera

Spraikada — 2008-08-28

Topaguneak Spraikda ALDIZKARIA argitaratu nahi du abenduan. Bertan Euskal Herriko graffitien berri emango da eta aldizkariaren zatirik garrantzitsuena Euskal Herriko txoko guztietako graffitilarien lanekin osatuko da. Aldizkarian zure lanak argitaratuak izan daitezela nahi baduzu bidali zure lanak ondoko helbidera: graffitiak@topagunea.org eta adierazi noiz eta non eginak diren zure artista izenarekin batera.

Zeren zai zaude?

Spraikada V. edizioa: irabazleak

Spraikada — 2008-07-21

http://www.flickr.com/photos/topagunea/sets/72157606259848017/

Graffitiaren gaineko erreportaia "Tele7"-n

Spraikada — 2008-07-21

http://www.tele7.tv/index.php?option=com_content&task=view&id=30754&Itemid=49

Graffitiaren gaineko erreportaia "Canal Bizkaian"

Spraikada — 2008-07-21

http://canalbizkaia.com/videos/inf15/graffiti.wmv

Graffiti Lehiaketaren gaineko komentarioak "El Pais"-en

Spraikada — 2008-07-21

http://www.elpais.com/articulo/pais/vasco/Arte/gamberrismo/elpepiesppvs/20080720elpvas_7/Tes

Graffiti Lehiaketaren gaineko komentarioak "El Correon"

Spraikada — 2008-07-21

http://www.elcorreodigital.com/vizcaya/20080720/margen-derecha/paredes-cobran-vida-20080720.html#comentarios

Spraikada 08 lehiaketa prentsan

Spraikada — 2008-07-21

http://www.argia.com/albistea.php?id=32112

Spraikada '08ren irabazleak

Spraikada — 2008-07-21

Erabaki zaila izan da, baina azkenean jakin dugu zeintzuk diren Spraikada '08, Euskal Herriko V. Graffiti Lehiaketaren irabazleak.

Hirugarren saria, 900 eurokoa, Berangoko Nuria Serrano 'Yubia'-rentzat izan da, Mundua kolorez bete lanarengatik:

Bigarren, saria, 1.200 eurokoa, Egoitz Konte 'Ojodekuervo'-k eta M. A Medina 'Kapone'-k eskuratu dute, Kalean gara artea lanarekin:

Lehenengo saria, 1.500 eurokoa, Iruñerrira joan da. Eneko Azpiroz 'JEAS'ek eta Diego Glennyk lortu dute, Fashion biktima lanarekin:

Zorionak guztioi, saridunei zein saririk gabekoei, egindako lanengatik, erabakia geo eta zailagoa jartzen duzue eta! Eta hasi prestatzen Spraikada '09rako! Gu lanean hasita gaude jadanik! Eta gogoratu Flickrren eskegi ditugula lehiaketako argazki piloa.

Graffitilariak jo ta su Erandioko hormetan

Spraikada — 2008-07-19

Erandioko hormak kolorez betetzen hasi dira gaur goizean, Spraikada ‘08ko lehiakideak iristen hasi diren heinean. Hamarretan hasi da Euskal Herriko Graffiti Lehiaketaren V. Edizioko partaideek lanari ekiteko epea.

Puntualitate arazoren bat edo beste izan da baina. Normala da: Euskal Herriko punta guztietako gazteak hurbildu dira gaurkoan Erandioko hormak kolorez betetzera, eta batek edo bestek arazoak izan ditu garraioarekin. Hala ere, goizeko hamaiketarako talde guztiak ari ziren lanean, spray poteei eragin eta eragin.

Baina ez pentsa bakarrak izan direnak. Eskolan graffiti eta break dance tailerra ere izan da, eta ume eta gazte piloa hurbildu dira hara, arte berri horien inguruko lehenengo pausuak ematera. Ikusi denagatik, gainera, beldurrik gabe esan daiteke benetako artistak daudela erandiotar gazteenen artean.

Musikarentzako ere izan da tarterik: Metroko plazan, DJ Oleaktiff ibili da inguratu nahi izan dutenei DJ eta Scratch munduaren sekretuen berri ematen. Hor ere ez da artistarik falta izan, eta hala DJaren nola inguratu direnen jardunak herrian paseoan zebilen jendearen arreta biziki piztu du.

Kiroldegi inguruan ere begiluze piloa elkartu da: izan ere, kiroldegiko atzeko horma, 450 metro koadrokoa, kolorez betetzen ari dira Gasteizko Xtralargos taldeko kideak. Duela pare bat egun hasi ziren gasteiztarrak lanean, eta lan benetan ikusgarria osatzen ari dira, kolore biziz josia.

Arratsaldeko 6ak arteko epea dute lehiakideek euren lanak bukatzeko. Pixka bat lehenago, 5:30 aldera, ikuskizun berezia izango da, metroko plazan hori ere: TTP taldeak auto bat margotuko du bertan, graffitia hormetako kontua baino zerbait gehiago dela erakusteko. Ondoren, goizean irakasle ibili den DJ Oleaktiffen saioa izango da, eta iluntzean, 8ak aldera, sari-banaketa izango da. Orduan jakingo dugu zein den aurtengo euskal graffitilaririk onena.